മസ്‌കറ്റ്: ഗൾഫ് സഹകരണ കൗൺസിൽ (GCC) രാജ്യങ്ങളിലെ മൊത്തം ജനസംഖ്യ 2025-ഓടെ 6.28 കോടിയായി (62.8 മില്യൺ) ഉയർന്നതായി ജിസിസി സ്റ്റാറ്റിസ്റ്റിക്കൽ സെന്ററിന്റെ (GCC-Stat) റിപ്പോർട്ട്. 2022-ൽ 5.66 കോടിയായിരുന്ന ജനസംഖ്യയിൽ നിന്ന് മൂന്ന് വർഷം കൊണ്ട് 62 ലക്ഷത്തിലധികം ആളുകളുടെ വർദ്ധനവാണ് രേഖപ്പെടുത്തിയിരിക്കുന്നത്. പ്രതിവർഷം ശരാശരി 3.5 ശതമാനം വളർച്ചാ നിരക്കാണ് ജിസിസി ജനസംഖ്യയിലുണ്ടായത്.ആഗോള ജനസംഖ്യയുടെ 0.8 ശതമാനത്തോളം വരുന്ന ജിസിസി മേഖലയിലെ ജനസംഖ്യ 2050-ഓടെ 8.36 കോടിയായി ഉയരുമെന്നും റിപ്പോർട്ട് പ്രവചിക്കുന്നു. ഇത് 2025-നെ അപേക്ഷിച്ച് 33.6 ശതമാനത്തിന്റെ വർദ്ധനവാണ്.ജിസിസി മേഖലയിലെ ജനസംഖ്യയുടെ ഭൂരിഭാഗവും യുവാക്കളാണെന്ന് കണക്കുകൾ വ്യക്തമാക്കുന്നു. 2024-ലെ കണക്കുകൾ പ്രകാരം മൊത്തം ജനസംഖ്യയുടെ 38.2 ശതമാനവും (2.35 കോടി ആളുകൾ) 15-നും 34-നും ഇടയിൽ പ്രായമുള്ളവരാണ്.
ജോലി ചെയ്യാൻ ശേഷിയുള്ള പ്രായത്തിലുള്ളവർ (15 മുതൽ 64 വയസ്സ് വരെ) മൊത്തം ജനസംഖ്യയുടെ 76.7 ശതമാനത്തോളമുണ്ട്. 15 വയസ്സിന് താഴെയുള്ള കുട്ടികൾ 20.6 ശതമാനവും 65 വയസ്സിന് മുകളിലുള്ള പ്രായമായവർ വെറും 2.6 ശതമാനം മാത്രവുമാണ്. ജോലി ചെയ്യാൻ ശേഷിയുള്ള ജനസംഖ്യ മുക്കാൽ ഭാഗത്തിലധികം വരുന്നത് രാജ്യങ്ങളുടെ സാമ്പത്തിക വളർച്ചയ്ക്കും ഉൽപ്പാദനക്ഷമതയ്ക്കും ശക്തമായ അടിത്തറ നൽകുന്നതാണെന്ന് റിപ്പോർട്ട് ചൂണ്ടിക്കാണിക്കുന്നു.
ജിസിസി രാജ്യങ്ങളുടെ ദ്രുതഗതിയിലുള്ള വികസനത്തിന് യുവാക്കളിൽ നിക്ഷേപം നടത്തുന്നതും അവരെ ശാക്തീകരിക്കുന്നതും എത്രത്തോളം നിർണായകമാണെന്ന് വ്യക്തമാക്കുന്നതാണ് പുതിയ കണക്കുകൾ.
